歌手鄧紫棋（G.E.M.）前晚於拉斯維加斯為《I AM GLORIA》世巡演出，她於台上跟現場觀眾傾偈時，坦言聽到工作人員說現場有很多香港人，說時她哽咽，之後又感觸落淚，她謂：「其實我見到咁多香港人好感動，因為我喺香港經歷咗太多嘢，由2008出道到今年2025年，已經17年！我出道時只得16歲，行上山坡時經歷咗好多艱難，但係我想話，好似我演唱會一開頭所講，人生總會遇到好多孤單，好多時候會遇到艱難，我回想冇人明白我嘅時候，甚至有段時間好多人都唔夠膽話有聽阿G.E.M.嘅歌，因為覺得講畀人聽會畀人笑，但我想講到今日我成長到33歲，嗰啲時間係好寶貴嘅，如果冇經過嗰啲時候，今日我就唔可以好堅強咁企喺度話畀你哋聽，真係冇任何嘢係過唔到嘅！」